टक्केवारीचं गणित...

मला लहानपणापासून टक्केवारीचं कोडं कधी समजलंच नाही. जे लोक कायम टक्केवारीत बोलतात, त्यांच्या बुद्धिमत्तेला खरंच दाद द्यावी लागणार. एकदा एकाला एक बातमी सांगताना तो व्यक्ती म्हणाला 'तुमची बातमी ७० टक्के खरी तर ३० टक्के खोटी आहे'. मी विचारलं कसं? त्या बातमीत तुम्ही जन्मवर्ष चुकीचे सांगितले. फक्त जन्मवर्ष चुकीचे सांगितले म्हणून ३० टक्के चूक बातमीत कशी काय होऊ शकते?. हे मला कळलंच नाही आणि हे अतिहुशार लोकं टक्केवारी कोणत्या आधारावर काढतात देवच जाणे. समजा एका डॉक्टर कडे एक रुग्ण गेला, आणि डॉक्टरांनी औषधी देऊन आठ दिवसांनी पुन्हा बोलावलं.
तो रुग्ण पुन्हा तपासणीला येतो तेव्हा डॉक्टर विचारतात किती टक्के आराम झाला? रुग्ण गोंधळून सांगतो '६५ टक्के आराम आहे' मग डॉक्टर विचारतात, 'खोकला कसा आहे?' 'ठिक आहे' मग डॉक्टर पुन्हा थांबतात..आणि मग विचारतात आता. 'तो विचार करून सांगतो आता ७० टक्के'.
आता हा प्रश्न आहे की टक्केवारी या रुग्णांने कशाच्या भरोशावर सांगितली आणि डॉक्टर सुद्धा टक्केवारीवर भरोसा कसा ठेवतात? 'तू आता इतके टक्के बरा झाला आहेस आणि शंभर टक्के बरा झाला कि सांग', असं टक्केवारीचा गृहपाठ देऊन त्याला घरी पाठवतात. पण हे अजबच गणित आहे हे डॉक्टरांचं !!
 वर्तमानातून आपण पावसाची टक्केवारी ऐकतो, यंदा ९० टक्के पाऊस पडणार किंवा ८० टक्के धरण भरलं. खरंतर, पाऊस आणि धरण किती टक्के भरलं हे मोजायची पद्धत आहे. आमच्या शहरात एक 'महाभाग ' थंडी सुद्धा टक्केवारीत सांगतात, यावर्षी ८० टक्केच थंडी पडली. खरंतर थंडी टक्केवारीत कशी मोजायची हे मी खूप जणांना विचारलं पण मला उत्तर नाही मिळालं. काही लोकं तर कायम टक्केवारीत बोलतात, 'मार्केट बंद आहे फक्त ६० टक्केच ग्राहक आहेत' असे ते सांगतात. बरं अशा लोकांसोबत कुठल्याही विषयावर बोला ते लगेच सांगतील कि भाजपाच्या काळात फक्त ५० टक्केच विकास झाला, आपण इकडे गोंधळतो कारण भाजपावाले म्हणतात, ' आम्ही ८० टक्के विकास केला, रस्त्यांची कामे ६५ टक्के पूर्ण झालीत, ५० टक्के शेतकऱ्यांना कर्जमाफीचा लाभ झाला.' ज्वारीची पेरणी ४५ टक्के कमी झाली, मेट्रोचं काम ९० टक्केच झालं. रेल्वेमध्ये ३५ टक्के आरक्षण होतं, शालेय पोषण आहारातील ३० टक्के तांदूळ परस्पर गायब होते, एवढच काय यांना तर कुठल्या मंत्र्याला, आमदाराला किती टक्के कमिशन मिळतं हे सुद्धा माहिती असतं. म्हणजे तुम्ही फक्त  विषय काढायचा हि मंडळी चौफेर  ज्ञान असल्यासारखं देशभरातील सगळी टक्केवारी तुम्हाला तोंडपाठ सांगणार.
टक्केवारीचं काम १०० टक्क्यांपर्यंतच असते तरी काही भारी असेही सांगतात, '१०१ टक्का होईल तुमचं काम किंवा आमचं काम २०० टक्के परफेक्ट असतं'. यामुळे माझ्यासारखी गणितात सामान्य असणारी विचारात पडते, हि टक्केवारी २०० टक्क्यांपर्यंत कशी काय गेली? असो ज्याचं त्याचं टक्केवारीचं गणित असतं , मला काय करायचं आहे?

विशेष म्हणजे अशी टक्केवारी सांगणारी मंडळी कधी घराबाहेर पडत नाही, तरीही त्यांचा अभ्यास एवढा दांडगा असतो की विचारायलाच नको. प्रख्यात गणिततज्ज्ञ "रामानुजन" आता असते तर ते सुद्धा चक्रावून गेले असते या टक्केवारीचं गणित ऐकून!!